Et merci à Lydie

ÉRECTION DE LA PRINCIPAUTÉ DE SALM

FAITE PAR L'EMPEREUR FERDINAND SECOND, EN FAVEUR

DE PHILIPPE OTTO, COMTE SAUVAGE DU RHIN

Le 08 Janvier 1623

_____________

Nous FERDINAND SECOND par la grace de Dieu, Esleü Empereur Des romains tousjour Auguste Roy de la Germanie, Hongrie, Boheme, Dalmatie, Croacie, Esclauonie, Archiduc d'Autriche, Duc de Bourgogne, Brabant, Styrie, Carinthie, Carniolie, Luxembourg, Wirtemberg, haulte et basse Silésie, Prince de Suabe, Gartz, Marquis du Sainct Empire Romain a Burgaw, Ajah'ren, haulte et basse Lautznitz(1), Comte princier de Habsbourg, Tirol Pfirdt(2), Kibourg et Görtz, Landgrave d'Alsace, Seigneur de la Marche Vindelice, de Portenau et de Salins &c : FAISONS A SCAVOIR a touts qu'il appartiendra, pour nous et nos successeurs au Sainct Empire, Qu'encor bien que la haulte dignité de la Majesté Impérialle, soit décorée par la puissance de son Throne splendide, comme aussi au moyen des Princes, Estats et Illustres tiges de Noblesse, néanmoins d'autant plus que par la mortalité des hommes, telles races de maisons, se sont Estainctes, et venües a manquer de temps a autre, d'autant plus la grandeur de la majesté Impérialle, pouruoi et Esleue celles qui restent suivant leur ancienne et Illustre Origine, Comportements, et mérittes, En quoy le Thronne de la de Majesté Impériale paroist d'autant plus magnifique et Auguste, et ses Subjects d'otant mieux informés et instruicts on la Cognoissance de la de dignité Impérialle et dans l'obéissance qu'ils doivent, et par la d'autant plus excités à exercer des Actions nobles de Vertu, produire des faicts généreux, et honorables, et a rendre des seruices fidels et constants, nonobstant quoy et encor bien que nous soyons tousjour par nostre bonté et douceur naturele Enclin, a cause de ceste nostre dignité Impérialle, de la quelle il a pleü a Sa diuine majesté nous honorer, de pouuoir et mestre en Concidération, l'honneur, dignité et aduancement de tous les membres et Estats, de haulte et basse Condition, Néanmoins noste Inclination Impériale est avec Justice bien plus portée a esleuer a de plus grands honneur, et a un plus hault estat et dégré de dignité, les personnes qui prennent leur nom et leur origine de prédécesseurs Illustres, lesquels ensemblement en sont rendus recoandables enuers les Empereurs Romains et Roys nos prédécesseurs, Enuers Nous et Nostre Maison Archiducalle d'Austriche, par leurs bons fidels, Loyalles et continuels Seruices, tant en temps de Paix que de Guerre.
Ainsy ayant bien pesé et meurement concidéré l'Ancienne maison et origine des Comtes Sauvages de Dhaun de Kirbourg Rheingraues de Stain, et Comtes de Salm, comme aussi les seruices Excellents et Concidérables rendus à nos prédécesseurs les Empereurs et Roys des Romains d'heureuse mémoire, par leurs Ancestres, et notament ceulx rendus par le noble nostre cher et Loyal, et de l'Empire Philipe Otton Comte Sauuage de Dhaun et de Kirbourg Rhingraue de Stain, et comte de Salm, Conseiller en nostre conseil de Guerre, et un de nos colonels, aux très haults et très puissants Princes Rudolph Second et Mathias Empereurs des Romains de très heureuse mémoire, nos très chers cousin de Père et derniers prédécesseurs, comme aussy a nostre personne depuis nostre auenement, a nostre Couronne Impérialle, en plusieurs et diuerses manières, et principalement contre le Turcq l'Ennemi commun de la Chrestienté, pandant la Guerre ouuerte de l'année dernière, et autrement dans autres affaires et commissions de conséquence, pour l'Empire Romain et la République, dans lesquelles il n'a espargné son corps, son bien, et son Sang a nostre contantement et satisfaction et a la renommée et honneur particulier de l'ancienneté de sa maison le tout généreusement et auec fidélité.
En suitte de quoy Nous, pour recognoissance des sus dt fameux et Généreulx comportements, longs et fidels seruices, de nostre volonté, bon Aduis, et science certaine, auons Esleué, dignifié et mis de nouueau, le sus dt Philippe Otton Comte Sauvage du Rhin et après lui son fils Aisné et de suitte tous les hoirs et héritiers, lesquels posséderont le Comté de Salm, a Jamais, dans le rang, honneur et dignité des Princes et Princesses des Nostres, et du Sainct Empire, les aggregans, associans, et comparants au nombre, Compagnie et Communauté des autres Princes et Princesses des Nostres et du St Empire, en telles sortes que des apresant le dt Philippe Otton Comte Sauuage du Rhin, et après lui son fils aisné et de suitte touts les hoirs et héritiers, lesquels possederont le Comté de Salm pourront des cy après se nommer et intituler Princes et Princesses de Salm, Ordonnons, Mettons et Eleuons et dignifions en suitte, d'authorité souueraine et puissance absolue et Impérialle, par ces présentes, de Science certaine et en vertu des présentes lectres, le sus dt Philippe Otton, Comte Sauuage du Rhin et après luy son fils aisné et de suitte tous les hoirs et héritiers tels quels, posséderont le dt Comté de Salm, et les mettons en la manière sus dte dans le rang honneur et dignité des Princes et Princesses des Nostres et du Sainct Empire Romain.
Et telle est nostre intention, ordonnance et volonté que le dt Philippe Otton Comte Sauuage du Rhin, et après luy son fils aisné et de suitte touts ses héritiers possédants le dt Comté de Salm soint, se nomment et s'intitulent a jamais et a tousjour Princes et Princesses de Salm, des Nostres et du Sainct Empire, soient tenus pour tels nommés et intitulés par nous, nos successeurs a l'Empire, et touts un chacun générallement quelconques et en conséquence jouissent, de toutes et chacunes graces, honneur, dignité, et aduantage préeminence, rang de Prince , droict et Juridiction et Assemblées des Exercices de Jeux des Cheuailliers, comme aussy des bénéfices dans les haultes et moyennes Cathédralles, Recoivent Fiefs, Ecclesiastiques, Temporels et aultres Charges, ou autrement possèdent et soient capables de toutes autres choses, pour en jouir, sen seruir et posseder suiuant leur honneur et leur nécessité a leur volonté et bon plaisir sans aucun empechement ou obstacle. Estant ceste présents nostre grace, et dignité sus de. Neanmoins sans porter aucun préjudice a Nous, et au Sainct Empire, ny a nos droicts, Justice et Juridiction non plus qu'aux droicts de personnes quelconques. Commandons ensuitte a touts et un Chacun Prince Electeur, Princes Ecclésiastiques et Séculiers, Prelats, Comtes, Barons, Cheualiers Soldats, Mareschaulx de province, gouuerneurs, Procureurs, Generaulx, Bailly, Chastellains, Officiers, Juges Provinciaux, Preuost, Bourgemaistres, Escheuins, Conseillers, Bourgois, Communaultés, et touts autres qu'il appartiendra nos subjects et du Sainct Empire Romain, comme aussy de nos Royaumes héréditaires, Principautés et payis, de quelle dignité Estat ou condition ils puissent estre, expressément et constament par et en vertu des présentes et voulons qui ceulx tiennent, honorent, nomment, et intitulent cy après et a jamais le dt Philippe Otton Comte Sauuage du Rhin Dhaun et Kirbourg Rhingraue de Stain, et Prince de Salm comme aussy son fils aisné et touts ses héritiers qui possederont la Comté de Salm, comme cy dessus Prince et Princesses de Salm des Nostres et de l'Empire, luy donnent aussi le titre et qualité Princière de Seigneur, les laissant paisiblement jouyr de tout et un chacun honneur dignité, prééminence, aduantage, droict, Juridiction et de ceste nostre grace Impérialle sans aucun Empechement ou obstacle de leur part, ny rien faire au contraire ou permettre qu'il soit faict chosse aucunne en quelle manière que ce puisse estre, a peine d'encourir la disgrace et punition de nous et du St Empire et en oultre une amande de deux cent maar d'Or pure payables sans rémission par celuy autant de fois que temerairement il contreuindra et applicables la moitié a Nostre chambre et celle de l'Empire, et l'autre moitié pour le dt Philippe Otton Prince de Salm, a son fils, et en suitte a touts les héritiers qui posséderont la de Comté de Salm.
En Tesmoignage de quoy et de vérité nous auons faict appendre aux présentes patentes de Prince, nostre Bulle Impérialle, en Or, qui furent donnée en nostre Ville Ipérialle de Ratisbonne, le huictuieme Jour du Mois de Janvier après la Nativité de Nostre Seigneur et Sauueur, six cent vingt et trois, de nostre Empire des Romains en sa quatrième année, de celuy de Bohème en la sixieme de celuy de Hongrie en la cinquième.

Signé FERDINAND.

Et plus bas : Ad mandatum cesareæ Majestatis.

Signé S. R. DUCHER.

Et a costé : cet Escript Collationné sur l'original de Sa Majesté Impérialle, lequel original se trouue en son entier, et conforme, En foy de quoy j'ay signé et apposé mon cachet ordinaire.
Aussy signé Jean FREYSSINGER, Registratur de la Chancellerie de l'Empire et cacheté en Cire sur Papier blanc trauersant un cordon de soye.
Pour translat d'Allemand en François tiré sur sa copie attestée, Signé et Cachetée comme cy dessus, par les Soubssigné Aduocat au Conseil de S. A. en sa cour Souueraine de Lorraine, et Barrois et translatteur Juré en Icelle et Sr Conforme en teneur de substance.

COLIN.

(1) Pour Lausitz, Lusace.
(2) Pour Pfirt, Ferette.